“Şahdəniz”çilər «Nabucco»da böyük payçı olmaq niyyətindədir

“APA-ECONOMICS”in xəbərinə görə, bunu “Nabucco Gas Pipeline International GmbH” konsorsiumunun sözçüsü Kristian Dolezal bildirib.

Onun sözlərinə görə, “Nabucco” hasilatçıları öz tərəfinə çəkməyə hazırdır: «Və mən inanıram ki, konsorsium və bizim səhmdarlarımız ümumi razılığa gələ biləcək və hər iki tərəf üçün həll yolu tapacaqlar».

K. Dolezal bildirib ki, “Nabucco”nun imkanları onunla nəql edilən qazı Avropanın demək olar ki, bütün nöqtələrinə çatdırmağa imkan verir.

Belə ki, “Nabucco” qazı Balkanlara və İtaliyaya ötürə biləcək: «Çünki Balkanlarda artıq birləşdirici kəmərlər mövcuddur. Və təbi ki hasilatçılar tərəfindən qazın Balkanlara və ya İtaliyaya çıxarılması barədə maraq göstərilərsə, onda “Nabucco” bu işi görməyə hazır olacaq. Özü də bunu həyata keçirə bilən yeganə layihə “Nabucco”dur».

Bundan başqa, Bolqarıstan və Serbiya, eləcə də Macarıstan və Xorvatiya arasında birləşdirici kəmər də artıq mövcuddur.

Digər tərəfdən, Bolqarıstan, Rumıniya, Avstriya və Macarıstanda hədən artıq böyük həcmdə qazı saxlamağa imkan verən qazsaxlama anbarları var: «Bunların hamısının imkanlarını nəzərə alsaq, ümumilikdə 10 milyard kubmetr qazın saxlanması imkanları var.Bu da o deməkdir ki, pik vaxtlarda, defisit olduğu təqdirdə anbarlardan qazı götürüb istifadə etmək mümkün olacaq. Bu da Avropadakı müştərilər üçün böyük imkanlar yaradır».

K. Dolezalın sözlərinə görə, Sloveniya, Bosniya və Xorvatiyanın qaz şəbəkəsinə qoşulmaq, Almaniya, Fransa, Çexiya və İspaniyaya çıxmaq imkanları da var.