Sərnişindaşıma taarifləri azalıb

Dövlət Statistika Komitəsi sentyabr ayında nəqliyyat və telekommunikasiya sektorunda tariflərin dəyişməsi haqqında məlumat yayıb.

Lent.az-ın Dövlət Statistika Komitəsinin rəsmi saytına istinadən verdiyi məlumata görə, sentyabr ayında nəqliyyat sektorunda yükdaşıma və sərnişindaşıma tarifləri uyğun olaraq 0,5 faiz və 0,1 faiz azalıb.

Dəmir yolu nəqliyyatında 10 ton yükün 1 km məsafəyə daşınmasının orta tarifi idxal üzrə 9,9 faiz, yerli əlaqə üzrə 7,8 faiz, ixrac üzrə 0,8 faiz, tranzit üzrə 1,7 faiz, həmçinin MDB ölkələrinə sərnişindaşıma tarifləri 7,0 faiz ucuzlaşıb. Dəniz nəqliyyatı vasitəsilə MDB ölkələrinə yükdaşıma tarifləri 0,1 faiz ucuzlaşıb. Hava nəqliyyatında xarici ölkələrə sərnişindaşıma tarifləri 0,1 faiz, MDB ölkələrinə yükdaşıma və sərnişindaşıma tarifləri isə uyğun olaraq 0,7 faiz və 10,5 faiz bahalaşıb. Boru kəməri vasitəsilə neftin nəql olunma tarifi isə 0,2 faiz ucuzlaşıb.

Telekommunikasiya sahəsində də internet tarifləri 13,0 faiz ucuzlaşıb.