Bilgəh-Novxanı-Sumqayıt yolunun tikintisi – FOTO

Bilgəh-Novxanı-Sumqayıt avtomobil yolunun tikintisi davam etdirilir. Lent.az-ın “Azəryolservis” ASC-nin mətbuat xidmətinə istinadən verdiyi məlumata görə, layihələndirilən avtomobil yolu Bakı şəhərinin Şimal hissəsindən, o cümlədən Bilgəh, Nardaran, Kürdəxanı, Fatmayi, Novxanı istiqamətində davam etməklə, Bakı-Rusiya Federasiyası ilə dövlət sərhədi avtomobil yolunun 16-cı km ilə kəsişərək Bakı – Şamaxı - Yevlax avtomobil yoluna birləşəcək.

Mərhələli şəkildə davam etdirilən tikinti işləri Bilgəh qəsəbəsindən Kürdəxanıya qədər olan 14 km-lik hissədə həyata keçirilir. Layihə üzrə nəqliyyat vasitələrinin və piyadaların təhlükəsiz hərəkətini təmin etmək üçün iki yol ötürücüsü və 3 piyada keçidinin inşası nəzərdə tutulub.

Artıq 14 km-lik hissədə tikinti altına düşən yaşayış və qeyri-yaşayış sahələri köçürülüb, bir yol ötürücüsü, bir piyada keçidi və yolun 5 km-lik hissəsində işlər tamamlanıb. Qeyd olunan hissədə işin bu il başa çatdırılması planlaşdırılır.

Hazırda yolun 14-42-ci km-lik hissəsinin layihələndirilməsi və paralel olaraq tikinti işlərinə start verilib.