Neymar komanda yoldaşını vurub Şok detallar

Gündəlik “L'Equipe” qəzetində “Neymarın süqutu” başlıqlı məqalə dərc olunub.

Lent.az bildirir ki, Fransa mətbuatı braziliyalının PSJ-dəki çıxışı zamanı davranışının təfərrüatlarını ətraflı təsvir edib.

2017-ci ildə “Santos”un yetirməsi tarixin ən böyük transferinin baş qəhrəmanı olub. Parislilər onu 222 milyon avro ödəyərək "Barselona"dan alıblar.

Geriyə nəzər salsaq, bu sövdələşməni uğurlu hesab etmək çətindir. Neymar Çempionlar Liqasında komandanı qələbəyə apara bilməyib və səhhətindəki müxtəlif problemlərə görə bir çox oyunu buraxıb.

Futbolçunun məşqçilərə və komanda yoldaşlarına qarşı davranışı da tənqidlərə səbəb olub. “L'Equipe” jurnalistləri ötən mövsüm Neymarın Kristof Qaltyenin köməkçisi ilə mübahisə etdiyini və bunu digər oyunçuların gördüyünü bildiriblər.

Məşqlərin birində İsmael Qarbi ilə də mübahisə yaranıb. Gənc yarımmüdafiəçi braziliyalıdan topu alıb, o, komanda yoldaşı qazonda yatarkən onun başına zərbə endirərək cavab verib. Bu, yeganə belə hadisə deyilmiş.

"Neymar məşqdə Vitinya ilə də kobud davranıb. Vitinya bunu inkar edib, çünki o, yaxşı oğlandır və problem istəmir, lakin o, bir neçə dəfə təhqir olunub", - klub mənbəsi deyib.

Fransa mətbuatı 32 yaşlı futbolçunun spirtli içki ilə bağlı ciddi problemləri olduğunu bir daha təsdiqləyib. Onun məşqə sərxoş gəldiyi iddia edilən hallar olub. Əvvəllər mətbuatda artıq futbolçunun bu aludəçiliklə bağlı problemlərinin olduğu haqda məlumatlar yayılmışdı.

“L'Equipe” onu da xəbər verir ki, Luis Enrike kluba gələn kimi Neymarı dərhal danlayıb. Məşqçi onu mövsümöncəsi Yaponiya turuna aparmaq istəməyib. Bununla belə, Luiş Kampuş məşqçini inandırıb ki, braziliyalı transfer bazarında dəyərini artırmaq üçün yoldaşlıq görüşlərində meydana çıxmalıdır.

Ötən yay Neymar Fransa paytaxtını tərk edib. Onu 90 milyon avro ödəyərək “Əl-Hilal” alıb. Hücumçu Səudiyyə klubunun heyətində cəmi 5 oyunda iştirak edə bilib. O, artıq bir neçə aydır ki, çarpaz bağın yırtılmasından müalicə olunur.