Azərbaycan yığması “100-lük”dən çıxdı

Lent.az-ın məlumatına görə, Azərbaycan milli komandası ötən ayla müqayisədə 7 pillə geriləyib.

Hazırda 288 xala malik komandamız Anqola ilə birgə 107-ci pillədə qərarlaşıb. Millimiz mart ayına nəzərən 32 xal geriləyib.

Yığmamızın 2012-ci il Avropa çempionatının seçmə qrup mərhələsindəki rəqiblərindən ən böyük sıçrayışa Belçika nail olub. Martın 25-də səfərdə Avstriyanı 2:0, öz meydançasında isə Azərbaycanı 4:1 hesabı ilə yenən “qırmızı şeytanlar” 25 pillə irəliləyiblər. Hazırda Belçika 654 xalla 37-ci pillədədir. Türkiyə də 2 pillə irəliləyib. “Ay-ulduzlular” 795 xalla 30-cudur. Əvəzində 1 pillə geriləyən Almaniya 1386 xalla 4-cü mövqeyə enib. 12 pillə geriləyən Avstriya 443 xalla 73-cü, 8 pillə geriləyən Qazaxıstan isə 151 xalla 140-cı mövqedə qərarlaşıb.

Siyahıya isə 1857 xalla dünya və Avropa çempionu İspaniya başçılıq edir. Son dünya çempionatının finalçısı Hollandiya 1702 xalla 2-ci pillədə qalıb. 2 pillə irəliləyən 5 qat dünya çempionu Braziliya 1425 xalla 3-cüdür.