“Mayın 28-də qələbə qazanaraq, Azərbaycan xalqına hədiyyə edəcəyəm” - MÜSAHİBƏ

- Mayın 28-də Çinin Quiyanq şəhərində italiyalı Klemente Russo ilə 2012-ci il London Yay Olimpiya Oyunlarına lisenziya xarakterli döyüşə çıxacaqsınız. Həmin günün Azərbaycan üçün dəyərini bilirsiniz?

- Xeyr. Açığı, bilmirəm. Hansı gündür?

- Respublika günü.

- Bu lap yerinə düşdü. Qələbə qazanaraq, Azərbaycan xalqına hədiyyə edəcəyəm. Ölkəniz üçün olimpiadaya lisenziya əldə edəcəyəm.

- Siz buna söz verirsiniz?

- Əlbəttə, başqa variant yoxdur. Yalnız qələbə!

- Yəqin ki, sizinlə birgə lisenziya döyüşünə çıxacaq Sultan Migitinov da bu cür düşünür...

- Əlbəttə. Onun da qalib gəlmək şansı var. Fikrimcə, o da qələbə qazanacaq.

- Rəqibiniz haqda hansı məlumatınız var?

- Bilirəm ki, italiyalı Klemente Russo 2007-ci il dünya çempionatında qızıl, 2008-ci il Pekin Yay Olimpiya Oyunlarında gümüş medal qazanıb. Güclü boksçudur. Bunu qrup mərhələsində hamıdan çox xal toplaması da təsdiqləyir.

- Siz ayrı-ayrılıqda hazırlaşacaqsınız, yoxsa...?

- Xeyr. Birlikdə hazırlaşacağıq. Hər şey rəhbərliyin qərarından asılı olacaq. Ola bilsin, rəhbərlik bizi ABŞ-a təlim-məşq toplantısına göndərəcək. Baxarıq. Hələ vaxtımız var.