“Baku Fires” Avropaya köçür

Lent.az-ın məlumatına görə, bu barədə klubun baş meneceri Rizvan Gənciyev jurnalistlərə açıqlamasında bildirib.

Onun sözlərinə görə, artıq bu məsələ 90 faiz həllini tapıb. Beynəlxalq Həvəskar Boks Assosiasiyası (AİBA) WSB Liqası layihəsinin özünü doğrultduğunu və bu turnirə Asiya qitəsində də marağın artdığını görərək, belə addım atıb: “Əslində “Baku Fires” “köhnə qitə”də mübarizə aparmalıdır. Lakin AİBA təşkilati baxımdan vaxtın və Asiya qitəsində komandaların azlığını nəzərə alaraq, bizim Asiyaya zonasında döyüşməyimizi məqsədəuyğun saydı. Amma bu layihəyə maraq artıb. Bütün qitələrdə, o cümlədən, Asiyada yeni-yeni komandalar yaranmaqdadır. Ona görə də qərara alınıb ki, hər zonada 4 deyil, 6 komandanın iştirakı ilə seçmə mərhələlər təşkil olunsun və “Baku Fires” Avropada çıxış etsin”.

Qeyd edək ki, bu mövsüm “Baku Fires” Asiya zonasında qrup mərhələsini lider kimi başa vuraraq, yarımfinala yüksəlib. Komandamızın növbəti rəqibi Avropa zonasının lideri Paris Yunayted” (Fransa) olacaq.

Elşən MƏMMƏDOV