FİFA prezidentliyinə namizədlər rəsmən açıqlandı - FOTO

Lent.az-ın məlumatına görə, bunlar qurumun hazırkı prezidenti Yozef Blatterlə Asiya Futbol Konfederasiyasının (AFC) rəhbəri Məhəmməd bin Həmmamdır.

Əvvəllər namizədlər siyajısına amerikalı jurnalist Qrant Uoll və Çili yığmasının sabiq kapitanı Elias Fiqeroanın da daxil edilməsinin mümkünlüyü bildirilirdi. Uol heç bir milli assosiasiyanın dəstəyini ala bilməyib. Fiqeroa isə bildirib ki, ona əsaslı prezident proqramı hazırlamaq üçün vaxt bəs etməyib. Potensial namizədlərin ərizələrinin qəbulu aprelin 1-də başa çatıb. Bundan sonra ərizələr qeydiyyata alınıb.

Qeyd edək ki, Yozef Blatter 1981 – 1998-ci illərdə FİFA-nın baş katibi kimi çalışıb. 1998-ci ildə isə o, təşkilatın prezidenti seçilib və ardından daha 2 dəfə bu postu tutub. 2007-ci ildə keçirilmiş son seçki alternativsiz olub. 61 yaşlı Məhəmməd bin Həmmam isə əvvəllər Blatterin arxadaşı olub. Lakin son zamanlar dəfələrlə FİFA prezidenti əleyhinə tənqidlər səsləndirib. Qətərli futbol xadiminin fikrincə, bu təşkilata yeni rəhbər lazımdır.