Kipr klubu Avropa Liqasından kənarlaşdırıldı

Kiprin “Anortosis” klubu Avropa Liqasından kənarlaşdırılıb. Lent.az-ın məlumatına görə, UEFA İntizam Komitəsi bu komandanı Avroliqanın 3-cü təsnifat mərhələsində Gürcüstan “Dila”sı ilə oyun zamanı azarkeşlərinin meydana soxulması üzündən diskvalifikasiya edib.

Səfərdə 0:1 hesabı ilə uduzan “Anortosis” cavab görüşündə qapısından 3 cavabsız top buraxıb. Bu zaman fanatlar meydana giriblər. Hakim isə oyunu dayandırmalı olub.

UEFA “Dila”nın 3:0 hesablı qələbəsini qüvvədə saxlayıb. Gürcüstan komandası “pley-off” mərhələsində Portuqaliya “Maritimu”su ilə üz-üzə gələcək. Qalib komanda qrup mərhələsinə yüksələcək. “Anortosis” isə Avroliqadan kənarlaşdırılmaqla yanaşı, 50 min avro cərimə ödəyəcək və qitə miqyaslı turnirlərdə növbəti 3 ev oyununu azarkeşsiz keçirəcək.

Qeyd edək ki, Kiprin daha bir klubu APOEL Avroliqanın “pley-off” mərhələsində “Neftçi” ilə üz-üzə gələcək. İlk oyun avqustun 23-də Bakıda, cavab görüşü bir həftə sonra Nikosiyada olacaq.