Yevlaxda ev yanıb, bir nəfər xəsarət alıb

Yevlax şəhərində yanğın hadisəsi baş verib, xəsarət alan var.

Rayon Yanğından Mühafizə Hissəsindən APA-ya verilən məlumata görə hadisə şəhər sakini 1947-ci il təvəllüdlü Məmmədova Təzəgül Məhəmməd qızına məxsus ümumi sahəsi 104 kvadratmetr olan birmərtəbəli 3 otaqlı evdə baş verib. Evin divarındakı qaz sayğacında nasazlıq səbəbindən baş verən alışma zamanı evin tavan hissəsi də alovlanıb. Dərhal əraziyə yanğınsöndürənlər çağırılıb. Ev sahibinin nəvəsi 1986-cı il təvəllüdlü Məmmədov Gündüz Rövşən oğlu müxtəlif vasitələrlə yanğına müdaxilə edərək alovun qarşısını almağa müvəffəq olub. Yanğınsöndürən maşınlar hadisə yerinə çatanadək Gündüz Məmmədov alovun qarşısını alıb, sayğacdakı və evin tavan hissəsindəki alov söndürülüb. O, yanğını söndürərkən əl və qolundan yanıq xəsarətləri alaraq Yevlax Mərkəzi rayon Xəstəxanasına yerləşdirilib.