Ustanın ölümündə günahlandırılan direktor müavininə bəraət verildi

Gəncə Apellyasiya Məhkəməsində ustanın ölümündə təqsirləndirilən Sadıx Sadıxov barəsindəki hökmdən verilən şikayətə baxılıb.

APA-nın məlumatına görə, hakim Teyyub Muxtarovun sədrliyi ilə keçirilən prosesdə qərar elan olunub.

Hakimlər kollegiyasının qərarına əsasən, Sadıx Sadıxovun barəsindəki birinci instansiya məhkəməsinin çıxardığı hökm ləğv edilib və ona bəraət verilib.

Qeyd edək ki, Qazaxda yerləşən “Saloğlu Fərdi Firması”nın “Karkas” sexində usta işləyən Etibar Məcidov təhlükəsizlik qaydalarının pozulması nəticəsində ölüb.

Rayon Prokurorluğu tərəfindən firmanın direktor müavini Sadıx Sadıxov barəsində Cinayət Məcəlləsinin 162-ci (Əmək mühafizəsi qaydalarını pozma, ehtiyatsızlıqdan insan ölümünə səbəb olduqda) maddəsi ilə cinayət işi başlanıb.

Qazax rayon Məhkəməsində S. Sadıxov 3 il müddətinə azadlıqdan məhrum edilib. Lakin onun barəsində Cinayət Məcəlləsinin 70-ci ( şərti məhkum etmə) maddəsi tətbiq edilib. S. Sadıxov barəsində 3 il sınaq müddəti seçilib.

Hökmlə razılaşmayan təqsirləndirilən şəxs apellyasiya şikayəti verib.