Taleh Bağırova hökm oxundu

Bu gün Sabunçu Rayon Məhkəməsinin hakimi Samir Əliyevin sədrliyi ilə həbsdə olan ilahiyyatçı Taleh Bağırovun cinayət işi üzrə məhkəmə prosesi başa çatıb.

APA-nın məlumatına görə, prosesdə çıxış edən dövlət ittihamçısı təqsirləndirilən şəxsin 3 il müddətinə azadlıqdan məhrum edilməsini istəyib. Bundan sonra hakim hökmü elan etmək üçün müşavirəyə gedib. Müşavirədən sonra hökm elan olunub. Hökmə əsasən, T. Bağırov il müddətinə 2 il azadlıqdan məhrum edilib.

Məlumata görə, proses iştirakçılarından biri hökm elan olunandan sonra hakimə etiraz edib. Həmin şəxs tutularaq Sabunçu rayon Polis İdarəsinə aparılıb.

Qeyd edək ki, Daxili İşlər Nazirliyinin mətbuat xidmətinin T. Bağırovla bağlı yaydığı məlumatda bildirilirdi ki, həyata keçirilən əməliyyat-axtarış tədbirləri nəticəsində Taleh Bağırov və Anar Məlikov saxlanılıblar. Baxış zamanı Taleh Bağırovun üzərindən 1,026 qram heroin, Anar Məlikovdan isə "Makarov" tipli tapança, 4 patron və 1 bıçaq götürülüb. Faktla bağlı cinayət işi başlanıb və hər iki şəxs həbs olunublar.

Məlumatda o qeyd olunub ki, aprelin 2-də naməlum şəxslər Nardaran qəsəbəsində yerləşən, xalq artisti Zeynəb Xanlarovaya məxsus bağ evinin qarşısında avtomat silahdan atəş açaraq yandırmaq məqsədilə onun həyətinə içərisinə yandırıcı maye doldurulmuş şüşə qablar atıblar. Daha sonra vətəndaş Rafiq İbrahimovun bağ evinin həyətinə də yandırıcı qablar atılıb birinci mərtəbənin şüşələri sındırılıb və divarına "Taleh Bağırova azadlıq!" sözləri yazılıb. Elə həmin gün, təxminən saat 05.35 radələrində Bakı şəhər İcra Hakimiyyətinin yaxınlığında şübhəli şəxs qismində Bəxtiyar Qurbanov və Röyal Əsgərov saxlanılıb, əllərindəki çantadan 1 ədəd 5 litrlik plastmas su qabında və 4 ədəd 1 litrlik qablarda benzin, daş parçası, pambıq, süngər və köhnə şalvar götürülüb.