Nazir: "Bölgələrdə həvəsləndirmə tədbirləri davam edəcək"

“Müəllimlərin işə qəbulu üçün imtahanlar bu il də davam etdiriləcək. Bu prosesdə zəruri minimal balın yığılması və müəllimlərin bilik səviyyəsi əsas şərt kimi götürüləcək”.

Lent.az-ın məlumatına görə, bunu təhsil naziri Mikayıl Cabbarov deyib. Onun sözlərinə görə, hər il olduğu kimi bu il də ilk dəfə işə qəbul olunan müəllimlərin bölgələrdə həvəsləndirmə tədbirləri Nazirlər Kabinetinin qərarına əsasən davam etdiriləcək.

M. Cabbarov iyulun 21-də Azərbaycanda keçiriləcək “ Beynəlxalq Kimya Olimpiadası”nın təhsil sahəsi üçün çox mühüm bir hadisə olduğunu qeyd edib. O bildirib ki, yuxarı sinif şagirdləri arasında keçiriləcək “Beynəlxalq Kimya Olimpiadası”da bir çox ölkədən nümayəndələr iştirak edəcək. Olimpiadanın təşkili ilə bağlı tədbirlərin həyata keçirilməsi üçün Moskva Dövlət Universitetinin Bakı filialının rektoru Nərgiz Paşayevanın rəhbərliyi ilə xüsusi komitə yaradılıb.