Masallı sakini həmyerlisini bıçaqlayıb

Masallıda bıçaqlanma hadisəsi baş verib. Bu barədə məlumatı APA-nın Cənub bürosuna Masallı Rayon Polis Şöbəsinin (RPŞ) müstəntiqi, polis mayoru Nizami Canıyev məlumat verib.

Onun sözlərinə görə, hadisə Masallı şəhərindəki avtosalonların birinin qarşısında qeydə alınıb. Masallı şəhər sakini, 1988-ci il təvəllüdlü Tural Bağı oğlu Əliyev şəxsi münaqişə zəminində rayonun Ətcələr kənd sakini, 1986-cı il təvəllüdlü Fəzrəddin Şahnəzər oğlu Allahyarova iki bıçaq zərbəsi ilə bədən xəsarətləri yetirib. Zərərçəkmiş yaxınlıqdakı şəxslər tərəfindən qarın boşluğuna keçən piylik və yoğun bağırsaq çözünün zədələnməsi, baş qulaq altı nahiyədə kəsilmiş-deşilmiş yarası diaqnozu ilə Masallı Mərkəzi Rayon Xəstəxanasına (MRX) yerləşdirilib.

Yaralının üzərində cərrahiyyə əməliyyatı aparılıb, onun durumu nisbi kafi qiymətləndirilir.

Masallı RPŞ əməkdaşlarının həyata keçirdikləri əməliyyat tədbirləri nəticəsində hadisəni törətmiş Tural Əliyev yaxalanaraq istintaq orqanlarına təhvil verilib. Masallı Rayon Məhkəməsinin qərarı ilə onun barəsində 3 ay müddətinə həbs qətimkan tədbiri seçilib.

Faktla bağlı Masallı RPŞ-də Cinayət Məcəlləsinin 126.1 maddəsi ilə cinayət işi açılıb, araşdırma aparılır.