Bakıda iki ailənin faciəsi: 4 ölü - YENİLƏNİB

Bakıda baş vermiş dəhşətli yol qəzasında ölən 4 nəfərin şəxsiyyəti müəyyənləşib. Bakı şəhər Baş Polis İdarəsindən Lent.az-a verilən məlumata görə, aprelin 12-i saat 23.40 radələrində, Sabunçu qəsəbəsi Şəhər şosesi küçəsində Bakı şəhər sakinləri - 1961-ci il təvəllüdlü Qabil Ələkbər oğlu Ələkbərovun idarə etdiyi 105 saylı xətt üzrə hərəkət edən “İveko Otoyol” markalı avtobusla 1980-ci il təvəllüdlü Vidadi Söyün oğlu Sərdarovun idarə etdiyi “VAZ-2107” markalı avtomobil toqquşub. Hadisə nəticəsində V.Sərdarov, sərnişinləri - qardaşı, 1988-ci il təvəllüdlü Etibar, 1963-cü il təvəllüdlü İlqar Nizami oğlu Orucov və oğlu 1990-cı il təvəllüdlü Elçin hadisə yerində ölüb.

Lent.az-ın məlumatına görə, Sabunçu rayon Polis İdarəsində faktla bağlı Cinayət Məcəlləsinin 263.3-cü maddəsi ilə iş başlanılıb, araşdırma aparılır.

01:00

Bakının Sabunçu rayonunda 4 nəfərin ölümü ilə nəticələnən ağır qəza baş verib.

APA-nın məlumatına görə, qəza Sabunçu-Zabrat yolunun Balaxanı qəsəbəsinə dönən hissəsində qeydə alınıb.

1990-cı təvəllüdlü Elçin İlqar oğlu Orucovun idarə etdiyi "VAZ 2107" markalı minik maşını ilə "105" saylı sərnişin avtobusu toqquşub. Nəticədə sürücü də daxil olmaqla hələlik kimliyi müəyyən edilməyən 3 nəfər hadisə yerində ölüb. Daha bir nəfər isə xəstəxanaya aparılarkən yolda dünyasını dəyişib.

.Qəza zamanı minik maşını deformasiyaya uğradığından hadisə yerinə Fövqəladə Hallar Nazirliyinin (FHN) Xüsusi Riskli Xilasetmə Xidmətinin (XRXX) əməkdaşları cəlb olunub. Xilasedicilər xüsusi alət və avadanlıqların köməyi ilə minik maşınında sıxışmış vəziyyətdə qalan cəsədləri çıxarıblar.

Qəzadan sonra Sabunçu-Zabrat yolunun bu hissəsində qısa müddətlik tıxac yaranıb.

Faktla bağlı Sabunçu Rayon Polis İdarəsində araşdırma aparılır.

Fövqəladə Hallar Nazirliyi (FHN) də hadisə ilə bağlı məlumat yayıb.

Nazirliyin saytında verilən məlumata görə, Sabunçu rayonunda “İVECO” markalı sərnişin avtobusu ilə “VAZ” markalı minik avtomobilinin toqquşması nəticəsində minik avtomobilinin sərnişini hadisə yerində vəfat edib və avtomobildə sıxılmış vəziyyətdə qalıb.. Xilasedicilər deformasiyaya uğramış avtomobildən meyiti çıxararaq, aidiyyətı üzrə təhvil veriblər.