Bakıda kütləvi davada atışma: 1 ölü, 2 yaralı - YENİLƏNİB

Bakıda silahlı insident baş verib. Sabunçu rayon Prokurorluğundan Lent.az-a verilən məlumata görə, yanvarın 7-nə keçən gecə Balaxanı qəsəbəsində iki qrup şəxs arasında kütləvi dava olub. Dava zamanı Bakı şəhər sakinləri Sadiq Musayev və Elçin Əliyev güllə yarası alıblar. Elxan Bayramzadə isə bıçaqlanıb. O, 3 saylı şəhər xəstəxanasında ölüb.

Əməliyyat-istintaq tədbirləri nəticəsində hadisədə iştirak etmiş Bakı sakinləri - Tahir Musayev, Əsəd Əliyev, onun qardaşları Teymur və Seymur Əliyevlər, həmçinin Ə. Əliyevin oğlu Məhəmməd Əliyev müəyyən edilib. Bir neçə nəfər yaxalanıb.

Hadisə yerindən 9 mm güllə gilizləri götürülüb.

Sabunçu Rayon Polis İdarəsindən Milli.Az-a verilən məlumata görə, qanlı hadisədə iştirak edən Sadiq Musayev və Tahir Musayev Səhiyyə Nazirliyi Məhkəmə-Tibbi Ekspertiza və Patoloji Anatomiya Birliyinin baş direktoru Şakir Musayevin qardaşının övladlarıdır. Dava zamanı ayağından güllə yarası alan S.Musayev xəstəxanada qalmaqdan imtina edərək evə buraxılıb.

Hazırda istintaq getdiyindən digər təfərrüatlar açıqlanmır.

Faktla əlaqədar Cinayət Məcəlləsinin 120.1, 29.120.2, 29.120.7 və 228.1-ci maddələri ilə iş başlanılıb.

Araşdırmalar davam etdirilir.