Azərbaycan Türkiyəyə gülənçilərlə bağlı MÜRACİƏT edib

Azərbaycan Respublikası Baş Prokurorluğu Türkiyə Cumhuriyyəti Baş Prokurorluğuna bu ölkədə istintaq hərəkətləri həyata keçirməklə bağlı müraciət edib.

Lent.az-ın xəbərinə görə, Respublika Baş Prokurorluğu, Daxili İşlər Nazirliyi və Dövlət Təhlükəsizliyi xidmətinin birgə yaydığı məlumatda bildirilir ki, Fətullah Gülənin adıyla bağlı “Hizmət hərəkatı”nın Azərbaycan Respublikası ərazisində fəaliyyət göstərən mənsublarının xarici ölkələrdə, o cümlədən Türkiyədə olan tərəfdaşları ilə əlaqələrinin, maliyyələşmə mənbələrinin, üsullarının və digər xüsusatların müəyyənləşdirilməsi məqsədilə, Avropa Konvensiyasının tələblərinə müvafiq olaraq Türkiyə Respublikası ərazisində istintaq hərəkətlərinin həyata keçirilməsi barədə həmin ölkənin Baş prokuroru qarşısında vəsatət qaldırılıb.

Qeyd edək ki, bu il iyulun 15-də Türkiyədə Gülən camaatı üzvlərinin qarışdığı iddia edilən hərbi çevriliş cəhdi olub. Bundan sonra Azərbaycanda da Gülən camaatı üzvlərinin qanunsuz hərəkətlərinin qarşısının alınması ilə bağlı cinayət işi açılıb.