(R) Azərbaycan Metallurqlar Cəmiyyəti “Worldsteel”ə üzv seçildi

Braziliyanın San-Paulo şəhərində “Worldsteel”in (Ümumdünya Polad İstehsalçıları Assosiasiyası) illik konfransı keçirilib. Dünyada polad biznesini birləşdirən ən iri sənaye assosiasiyalarından olan “Worldsteel”in payına planetin polad istehsalının 85%-i düşür. Qurumun bu dəfəki konfransında iştirak edən “Azərbaycan Metallurqlar Cəmiyyəti” təşkilata üzv seçilib.

Konfransın Reqional Asosiasiyalarının görüşündə Azərbaycan metallurgiyasının təqdimatı keçirilib. Ölkə metallurgiyasının tarixi, respublikada fəaliyyət göstərən aparıcı metallurgiya şirkətlərinin icmalı və ölkə rəhbərliyinin bu sahənin inkişafına xüsusi diqqəti əks olunan materiallar nümayiş etdirilib. Azərbaycan hakimiyyətinin həyata keçirdiyi uğurlu layihələr nəticəsində son illər ağır sənayenin, o cümlədən, metallurgiya və maşınqayırma sənayesinin inkişaf etdiyinin vurğulandığı təqdimatda, iqtisadiyyatın neft gəlirlərindən diversifikasiya edilməsi – qeyri-neft sektorunun inkişaf etdirilməsinin hökümətin fəaliyyətinin prioritet istiqaməti olduğu göstərilib. Təqdimat “American Iron and Steel Institute”, “Brazil Steel Institute”, “China Iron and Steel Assoc.”, “German Steel Federation”, “Eurofer” “Avropa Polad İstehsalçıları Assosiasiyası” və s. bu kimi iri təşkilatların nümayəndələrinin böyük marağına səbəb olub.

Konfrans zamanı dünya iqtisadiyyatının inkişaf templəri və polad istehlakının azalması müzakirə edilən mövzular sırasında olub. Mövcud olan problemlərə baxmayaraq, proqnozlara əsasən bu il dünya üzrə polada olan tələbat 3.1%, gələn il isə daha 3.3% artacağı bildirilib. Bir sıra ekspertlərin rəyinə görə isə faktiki artım “Worldsteel”ın proqnozlaşdırdığı rəqəmlərdən də çox olmalıdır. Konfrans zamanı həmçinin, 2014-cü ildə artımın bir sıra amillərdən, o cümlədən, iri boru kəməri və infrastruktur layihələrinin həyata keçirilməsindən asılı olacağı nəzərə çatdırılıb. Təşkilat Şurasının sədri A. Mordaşov inşaat sektorunda polada olan tələbatın sürətli artım templərinin müşahidə olunduğunu vurğulayıb.

Konfransın sonunda “Worldsteel”in nizamnaməsinə uyğun olaraq Aleksey Mordaşov sədrlik ilinin sona çatması ilə assosiasiyanın Direktorlar Şurasındakı yerini Koreyanın “POSCO” şirkətinin baş direktoru və Direktorlar Şurasının sədri cənab Cun Yanq Çunqa təhvil verib.