Lerikdə dərədən donmuş kişi meyiti tapıldı - YENİLƏNİB

Lerikdə dərədə meyiti tapılan şəxsin kimliyi məlum olub.

Lent.az APA-ya istinadən verdiyi məlumata görə, meyiti tapılan şəxsin Lerik rayon sakini, 60 yaşlı Fəxrəddin Məmməd oğlu Orucov olduğu bildirilir.

Məlumata görə, Fəxrəddin Orucov yanvarın 28-də səhər alış-veriş etmək üçün rayonun Piran kəndinə gedib. Axşam evə qayıdanda avtomobilini kənarda saxlayıb və evə piyada getməli olub. Buzlu yolda onun ayağının sürüşdüyü, hündürlükdən dərəyə yıxıldığı ehtimal olunur. F.Orucovun donmuş halda olan meyitini görən şəxslər bu barədə aidiyyəti üzrə məlumat veriblər.

Qeyd edək ki, meyit aşkar olunan Veri-Əliabad kəndi istiqamətində 40-50 santimetr qalınlığında qar var, yollar buz bağlayıb.

***

15:06

Yanvarın 29-da səhər saatlarında Lerik rayonunun dağlıq ərazisində, dərədə kişi meyiti aşkarlanıb.

Lent.az-ın APA-ya istinadən verdiyi xəbərə görə, meyit müayinə olunması üçün Məhkəmə Tibbi Ekspertiza və Patoloji Anatomiya Birliyinin Lənkəran rayon şöbəsinə təhvil verilib.

Meyitdə zorakılıq əlaməti aşkar olunmayıb. Meyitin bir neçə gün həmin ərazidə qaldığı məlum olub.

Hazırda ölən şəxsin kimliyi və ölüm səbəbi araşdırılır.