Bakıda ŞOK OLAY: məhkumu şəhərin mərkəzində döydülər

Bakıda şərti azadlıqda olan məhkuma qarşı quldurluq edilib.

Daxili İşlər Nazirliyindən Lent.az-a verilən məlumata görə, fevralın 15-də Bakı şəhər sakini, Cinayət Məcəlləsinin 128-ci (Qəsdən sağlamlığa yüngül zərər vurma) və 234-cü (Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə məhkum edilmiş B.Zeynalov 2 nəfər tərəfindən döyülüb və Ədliyyə Nazirliyi tərəfindən ayağına taxılan qolbağı əlindən alınıb. Hadisəni törədən şəxslər qolbağı qaytarması müqabilində ondan pul tələb ediblər. Bu barədə Nəsimi rayon Polis İdarəsinin 21-ci Polis Bölməsinə məlumat daxil olub.

Polis əməkdaşlarının keçirdikləri əməliyyat tədbirləri nəticəsində quldurluq əməlini törətməkdə şübhəli bilinən Şamaxı rayon sakinləri İ.Qaçayev və əvvəllər də soyğunçuluq və quldurluğa görə məhkum olunmuş S.Məmmədov müəyyən edilərək saxlanılıblar.

Faktla bağlı Nəsimi rayon Polis İdarəsində araşdırma aparılır.