İsmayıllı dağlarında yanğının miqyası genişlənir

İsmayıllı rayonundakı dağlıq ərazilərdə baş verən yanğının miqyası genişlənir. APA-nın məlumatına görə İsmayıllı rayonunun Bakı-Şamaxı-Yevlax avtomobil yolunun kənarında yerləşən Gəraybəyli və Eyyubbəyli kəndlərinin dağlıq ərazisində baş verən yanğının söndürülməsi üçün əraziyə İsmayıllı, Ağsu, Göyçay və Kürdəmir yanğından mühafizə hissələrinin maşınları və canlı qüvvəsi, eləcə də Şamaxıda yerləşən Mülki Müdafiə Qoşunlarının əsgərləri və iki helikopter cəlb edilib.

Girdiman çayının sahili boyunca uzanan kiçik ağac və kolluqlardan ibarət yaşıllıq sahəsinin 6 hektarlıq ərazisi yanıb. Bu gün səhər saat 9:00 radələrində başlanan yanğın hazırda davam edir və dağlıq ərazi olduğu üçün alovun qarşısının alınması çətinləşib.

Yanğının hansı səbəbdən baş verməsi hələ ki, məlum deyil. Fövqəladə Hallar Nazirliyinin Qəbələdəki Şimal-Qərb Regional Mərkəzinin və Dövlət Yanğından Mühafizə Xidmətinin rəhbər şəxsləri hadisə yerindədir.