Zaqatalada dəhşətli yol qəzası olub: 3 ölü, 4 yaralı

Daxili İşlər Nazirliyi (DİN) Baş Dövlət Yol Polisi İdarəsinin istintaq şöbəsindən APA-nın Şəki-Zaqatala bürosuna verilən məlumata görə, 3 nəfərin ölümü, 4 nəfərin ağır yaralanması ilə nəticələnən ağır yol qəzası Yevlax-Zaqatala-Gürcüstan magistiral yolunun 113-cü km-də, Zaqatala rayonunun Əliabad kəndi ərazisində qeydə alınıb.

Balakən rayonu Qabaqçöl qəsəbə sakini, 1981-ci il təvəllüdlü Nuruyev Nuru Ramazan oğlunun idarə etdiyi “Opel-Vektra” markalı, 08 BE 739 dövlət nişan nömrəli avtomobil hərəkət istiqamətini itirərək yolun kənarındakı ağaca çırpılıb. Baş vermiş ağır yol qəzası nəticəsində avtomobildə olan bir ailənin iki üzvü - 1981-ci il təvəllüdlü, Balakən rayonu Qabaqçöl qəsəbə sakini Teyibova Puhiyyə Şamil qızı, onun 2005-ci il təvəllüdlü oğlu Qaxov Maqammedəli Rəfail oğlu və avtomobilin sürücüsü Nuru Nuruyevin 2008-ci il təvəllüdlü qızı Nuruyeva Diana Nuru qızı hadisə yerində keçinib.

Avtomobilin sürücüsü Nuru Nuruyev və avtomobildə olan digər sərnişinlər - Balakən rayonu Qabaqçöl qəsəbə sakinləri, 1961-ci il təvəllüdlü Gəncəyev Abdulla Dada oğlu, 1986-cı il təvəllüdlü Nuruyeva Aynurə Zumrat qızı və 2002-ci il təvəllüdlü Qaxova Gülzar Rəfail qızı aldığı müxtəlif dərəcəli bədən xəsarətləri ilə Zaqatala Mərkəzi Rayon Xəstəxanasına yerləşdiriliblər. Onların durumunun ağır olduğu bildirilir.

Faktla bağlı DİN Baş Dövlət Yol Polisi İdarəsinin istintaq şöbəsində cinayət işi başlanıb, araşdırma aparılır.