FHN Neft Emalı Zavodunda baş verən yanğınla bağlı məlumat yaydı

Fövqəladə Hallar Nazirliyi bu gün Bakı şəhəri, Nizami rayonunda yerləşən Heydər Əliyev adına Neft Emalı Zavodunun istehsalat sahəsində baş vermiş yanğın hadisəsi ilə bağlı məlumat yayıb. Lent.az-ın nazirliyin saytına istinadən verdiyi məlumata görə, benzin borusunda təmir işləri aparılan zaman yanğın baş verib.

Nəticədə, həmin borudan ətrafa dağılmış benzin və borunun şüşə-pambıq izolyasiyası 4 kvadrat metr sahədə yanıb, təmir işləri aparan 2 nəfər yanıq xəsarətləri alıb. Yaralılar xəstəxanaya aparılıb.

Hadisə yerinə cəlb edilən yanğınsöndürənlər tərəfindən istehsalat sahəsi yanğından mühafizə olunub. Yanğın saat 09:38-də yanğınsöndürənlər tərəfindən söndürülüb.

İlkin ehtimala görə, yanğına təmir işləri aparılan zaman yanğın təhlükəsizliyi qaydalarının pozulması səbəb olub. Hadisə ilə əlaqədar müvafiq qurumlar tərəfindən araşdırma aparılır.