Ağsuda çayda qalan 3 nəfər xilas edilib

İyunun 13-də Ağsu rayonu, Kalva kəndi ərazisindən keçən çayda 3 nəfərin köməksiz vəziyyətdə qalması barədə məlumat daxil olub.

Lent.az-ın Fövqəladə Hallar Nazirliyinin rəsmi saytına istinadən verdiyi məlumata görə, hadisə yerində əməliyyat şəraiti qiymətləndirilərkən məlum olub ki, çayda suyun artması çayı keçmək istəyən 3 nəfərin çayın ortasında quru sahədə çıxılmaz vəziyyətdə qalmasına səbəb olub.

Xilasedicilər təhlükəsizlik qaydalarına riayət etməklə xüsusi texnika vasitəsilə vətəndaşları təhlükəsiz əraziyə çıxarmış və aidiyyəti üzrə təhvil veriblər. Əraziyə cəlb edilmiş Təcili Tibbi Yardım Stansiyasının həkimləri tərəfindən gərgin psixoloji vəziyyətdə olan həmin şəxslərə hadisə yerində ilkin tibbi yardım göstərilib. Əməliyyat saat 17:25-də başa çatıb.