Neft Akademiyasındakı terrorda yaralananlardan biri evə buraxıldı
12 may 2009 18:45 (UTC +04:00)

Neft Akademiyasındakı terrorda yaralananlardan biri evə buraxıldı

2 nəfər isə reanimasiyadan çıxarılaraq palataya yerləşdirilib

Aprelin 30-da Azərbaycan Dövlət Neft Akademiyasında baş verən terror zamanı yaralanan şəxslərdən 1 nəfəri evə buraxılıb, 2 nəfər isə reanimasiyadan çıxarılaraq palataya yerləşdirilib.

1 saylı xəstəxananın cərrahiyyə şöbəsinin baş həkiminin müavini Adil Salahovun Lent.az-a verdiyi məlumata görə, reanimasiya şöbəsində yatan akademiyanın dosenti Faiq Rüstəmbəyli artıq evə buraxılıb. Neft Akademiyasında laborant işləyən Zemfira Hüseynli və Ervin Cəmiyev isə reanimasiyadan çıxarılaraq palataya yerləşdiriliblər. Xəstəxanada yatan digər yaralıların isə bir həftə ərzində evə buraxılacaqları gözlənilir.

Reanimasiyadan çıxan Zemfira Hüseynli Lent.az-ın əməkdaşı ilə söhbətində təhsil ocaqlarındakı təhlükəsizliyin yüksək səviyyədə qorunmasının vacibliyini deyib: “Axı nəyə görə məni kimsə vurmalıdır? Bu hadisə sabah sizin, mənim övladlarımın, hər kəsin başına gələ bilər. Əgər təhlükəsizlik qorunsaydı, mənim içəri daxil olmaq üçün vəsiqəm olsaydı göstərib keçərdim. Hər hansı bir terrorçu gəlib bu hadisəni törədə bilməzdi. Nə qədər cavanlar öldülər, yaralandılar. Təhlükəsizliyə fikir vermək lazımdır”.

Qeyd edək ki, Azərbaycan Dövlət Neft Akademiyasında baş verən hadisə zamanı 13 nəfər ölüb, 13 nəfər isə müxtəlif dərəcəli bədən xəsarətləri alıb.

Şəhriyar Əlizadə
# 486

Oxşar yazılar