Ombudsman Bakı Apellyasiya Məhkəməsinə müraciət edib
09 aprel 2009 17:31 (UTC +04:00)

Ombudsman Bakı Apellyasiya Məhkəməsinə müraciət edib

İnsan hüquqları üzrə müvəkkil baş redaktor Asif Mərzilinin azad olunmasını xahiş edir


İnsan Hüquqları üzrə Müvəkkil Elmira Süleymanovanın tapşırığına əsasən, Ombudsman Aparatının Ədliyyə Nazirliyi Penitensiar Xidmətinin Bayıldakı 1 saylı istintaq təcridxanasında saxlanılan “Təzadlar” qəzetinin baş redaktoru Asif Məmmədovla (Mərzili) görüşüb, vəziyyəti ilə maraqlanıblar.

Bu barədə Lent.az-a Ombudsman Aparatının mətbuat xidmətindən bildirilib. Baş redaktor saxlandığı müddətdə hüquqlarının pozulmasına yol verilmədiyini, saxlanılma şəraitindən, müəssisə əməkdaşlarının ona qarşı rəftarından narazı olmadığını söyləyib. A.Mərzili məhkəmənin ona qarşı ədalətsiz hökm çıxardığını, bununla bağlı yuxarı instansiya məhkəməsinə apellyasiya şikayəti verəcəyini bildirib. O, vəziyyəti ilə maraqlandığına görə Müvəkkilə təşəkkürünün çatdırılmasını xahiş edib.

Müvəkkil baş redaktorun həbs olunması ilə bağlı məsələnin Azərbaycan qanunvericiliyi və Avropa İnsan Hüquqları Konvensiyasının tələblərinə uyğun olaraq həll edilməsini nəzarətə götürüb, onun cəzadan azad edilməsi və ya alternativ cəza növünün tətbiqi tövsiyəsi ilə Bakı Apellyasiya Məhkəməsinə müraciət edib.

Xatırladaq ki, A.Mərzili Yasamal Rayon Məhkəməsinin aprelin 7-də çıxardığı hökmlə bir il müddətinə (Cinayət Məcəlləsinin 147-ci maddəsi ilə) azadlıqdan məhrum edilib.

Pərvin ABBASOV
# 748

Oxşar yazılar