Asif Mərzili: “Prezidentə təşəkkür edirəm”

“Bakı Apellyasiya Məhkəməsinin bu gün çıxarılan qərarı göstərdi ki, Azərbaycanda söz və mətbuat azadlığı var və bu, dövlət başçısı, Ombudsman, məhkəmə, vəkillər səviyyəsində qorunur”.

Bu sözləri Lent.az-a açıqlamasında bu gün həbsdən azad edilmiş “Təzadlar” qəzetinin baş redaktoru Asif Məmmədov (Mərzili) deyib. O bildirib ki, başqa hakimlər də jurnalistlər haqqında hökm çıxararkən ehtiyatlı olmalıdırlar. “Mən dövlət başçısına, Ombudsman Aparatına və ölkənin bütün vicdanlı imkanlarına təşəkkür edirəm, minnətdarlığımı çatdırıram. Bizi dəstəkləyən bütün jurnalistlərə, o cümlədən sizin kollektivə təşəkkür edirəm. Ötən 2 gün ərzində hamısı bizə mənəvi dayaq olub”, - deyə o, əlavə edib.

Xatırladaq ki, A.Mərzili aprelin 7-də Yasamal rayon Məhkəməsinin qərarı ilə Beynəlxalq Universitetinin rektoru Elşad Abdullayevin Cinayət Məcəlləsinin 147-ci (böhtan) və 148 (təhqir) maddələri ilə qaldırdığı iddia əsasında 1 il müddətinə azadlıqdan məhrum edilmişdi. “Təzadlar” qəzetinin əməkdaşı jurnalist Zümrüd Məmmədovanın barəsində isə 6 aylıq icbari cəza müəyyənləşdirilmişdi. Bu gün Apellyasiya Məhkəməsinin hakimi Qail Məmmədov onun azadlığa çıxması barədə qərar qəbul edib. Digər jurnalist Zümrüd Məmmədovanın barəsindəki 6 aylıq icbari cəzanın ləğv olunması barədə qərar çıxarıb.

Pərvin ABBASOV