“Təzadlar” qəzetinin baş redaktoru Asif Mərzili azadlığa buraxıldı

Məhkəmə qəzetin xanım əməkdaşının cəzasını da ləğv edib

Bu gün Bakı Apellyasiya Məhkəməsində “Təzadlar” qəzetinin baş redaktoru Asif Məmmədovun (Mərzili) apellyasiya şikayətinə baxılıb.

Bu barədə Lent.az-a baş redaktorun həyat yoldaşı Yasəmən Məmmədova məlumat verib. O bildirib ki, hakim Qail Məmmədov Yasamal rayon Məhkəməsinin qərarının dəyişdirilməsi, baş redaktorun azadlığa buraxılması, digər jurnalist Zümrüd Məmmədovanın barəsindəki 6 aylıq icbari cəzanın ləğv olunması barədə qərar çıxarıb.

Həyat yoldaşı A.Mərzilinin yaxın dəqiqələrdə həbsdən çıxacağını bildirib.

Xatırladaq ki, A.Mərzili aprelin 7-də Yasamal rayon Məhkəməsinin qərarı ilə Beynəlxalq Universitetinin rektoru Elşad Abdullayevin Cinayət Məcəlləsinin 147-ci (böhtan) və 148 (təhqir) maddələri ilə qaldırdığı iddia əsasında 1 il müddətinə azadlıqdan məhrum edilmişdi. “Təzadlar” qəzetinin əməkdaşı jurnalist Zümrüd Məmmədovanın barəsində isə 6 aylıq icbari cəza müəyyənləşdirilmişdi.

Pərvin ABBASOV