Neft Emalı Zavodunun xidmət rəisi yanğın zamanı ölüb

Azərbaycan paytaxtında Heydər Əliyev adına Neft Emalı Zavodunda bu gün baş verən yanğın nəticəsində bir nəfər ölüb.

Bu barədə APA-ya Nizami rayon Polis İdarəsinin 23-cü Polis Bölməsindən məlumat verilib. Məlumata görə, hadisə baş verən zaman yanğının qarşısını alan yanğınsöndürən briqadasının rəhbəri, Neft Emalı Zavodunun Yanğından Mühafizə Xidmətinin rəisi, polkovnik, 1955-ci il təvəllüdlü Elçin Meydan oğlu Mansurovun vəziyyəti qəflətən pisləşib. E. Mansurov təcilli tibbi yardım maşını ilə xəstəxanaya aparılarkən yolda dünyasını dəyişib.

Bakı Şəhər Təcilli və Təxirəsalınmaz Tibbi Yardım Stansiyasının baş həkiminin müavini Rauf Nağıyev isə APA-ya açıqlamasında E. Mansurovun ürək tutmasından öldüyünü deyib. R. Nağıyev həmçinin mərhumun uzun müddət ürək xəstəliklərindən əziyyət çəkdiyini qeyd edib.

Qeyd edək ki, bu gün səhər saat 09:30 radələrində Heydər Əliyev adına Neft Emalı Zavodunun rayonun Keşlə qəsəbəsi, Oqtay Vəliyev küçəsi, 1 ünvanında yerləşən sexində yanğın baş verib. Məlumata görə, yanğın güclü olduğundan “3 saylı çağırış” elan olunub.
Zavodun təhlükəsizlik idarəsinin rəisi Vasif Qubuşov jurnalistlərə açıqlamasında yanğının zavodun zibilxanasında baş verdiyini bildirib. V. Qubuşov həmçinin qeyd edib ki, yanğın “Ekol” şirkətindən od sıçraması nəticəsində yaranıb.