Keşlə Ət Kombinatındakı yanğın söndürülüb

Hadisə nəticəsində xəsarət alan olmayıb

Bu gün səhər saat 9.00 radələrində Nizami rayonu ərazisində yerləşən Keşlə Ət Kombinatında başlayan yanğın söndürülüb.

Lent.az-ın hadisə yerində olan əməkdaşı xəbər verir ki, yanğının qarşısının alınması üçün əraziyə Nizami və ətraf rayonların Yanğından Mühafizə Xidmətinin əməkdaşları, Mülki Müdafiə Qoşunlarının əsgərləri cəlb olunub. Küləkli hava şəraiti yanğının söndürülməsinə maneçilik törətməsinə baxmayaraq, alov nəzarət altına alınıb. Hadisə nəticəsində xəsarət alan olmayıb.

Dövlət Yanğından Mühafizə Xidmətinin rəis müavini Rza Xudiyev Lent.az-ın əməkdaşına bildirib ki, yanğın təxminən 1000 kv.m ərazidə, fəaliyyət göstərməyən sexdə başlayıb. Əvvəlcə sexin ətrafına yığılmış kipləşdirilmiş karton qutular yanıb. Sonra alov istifadə edilməyən, sökülməkdə olan tikililərə keçib. Hazırda alovun qarşısı tam alınıb. Kipləşdirilmiş kartonların tam söndürülməsi üçün əraziyə buldozer gətirilib.

Qeyd edək ki, hazırda fəaliyyətini dayandırmış kombinatın ərazisində ayrı-ayrı sexlər fəaliyyət göstərir. Yanğın kağız tullantılarının emalı sexində başlayıb.
Hadisə barədə ilk məlumatı APA yayıb.

Elşən Məmmədov