Generalın qətlini araşdırmaq xarici ölkələrə müraciət olunmayıb

Azərbaycan Müdafiə Nazirliyinin Hərbi Hava Qüvvələri və Hava Hücumundan Müdafiə Qoşunları komandanı, general-leytenant Rail Rzayevin qətlinin araşdırılması üçün Azərbaycan tərəfi heç bir xarici ölkəyə müraciət etməyib.

Bunu Lent.az-a açıqlamasında Baş Prokurorluğun mətbuat xidmətinin rəhbəri Eldar Sultanov deyib. E.Sultanov bildirib ki, Baş Prokurorluq və Azərbaycanın xüsusi xidmət orqanları kifayət qədər müasir texnika və texnologiya ilə təchiz olunub: “Azərbaycanda peşəkar mütəxəssislər var və cinayətin açılması üçün intensiv araşdırma aparılır. Azərbaycan tərəfi cinayət işini araşdırmaq üçün başqa ölkələrin hüquq-mühafizə orqanlarına müraciət etməyib”.

Qeyd edək ki, R.Rzayev fevralın 11-də səhər saatlarında evinin qarşısında qətlə yetirilib.
Faktla bağlı Cinayət Məcəlləsinin 120-ci (qəsdən adam öldürmə) və 228-ci (qanunsuz olaraq odlu silah əldə etmə, saxlama, satma, daşıma, göndərmə) maddələri ilə cinayət işi başlanılıb. Qatilin tutulması istiqamətində istintaq gedir.

Şəhriyar Əlizadə