Gədəbəyin 2 kəndində sürüşmə təhlükəsi artır

Kənd sakinləri isə evlərindən çıxmaq istəmirlər

Gədəbəy rayonunun iki kəndində torpaq sürüşməsi təhlükəsi yaranıb. Rayon İcra Hakimiyyətindən Lent.az-a verilən məlumata görə, buna baxmayaraq, Arıqıran və Şahdağ kəndlərində yaşayan 9 ailə uçmaq təhlükəsi olan evlərindən çıxmaq istəmir.

Bu kəndlərdə sürüşmə təhlükəsi aprel ayının sonlarından etibarən yaranıb. Həmin vaxtdan rayon ərazisində təhlükəsizlik tədbirləri görülməyə başlayıb. Arıqırandakı ailələr yeni tikilmiş evlərə köçürülür. Şahdağdakı ailələrdən isə dərhal evlərdən çıxaraq, başqa yerlərdə qalmaları xahiş olunub. Arıqıran kəndində 4, Şahdağda isə 5 ailə var.

RİH-dən verilən məlumata əsasən, həmin kəndlərdə təhlükəli vəziyyət 2003-cü ildən etibarən əmələ gəlib. Yeddi il əvvəl Şahdağ kəndində bir evin uçması nəticəsində eyni ailənin 4 üzvü dağıntılar altında qalaraq həlak olub.

Həmin hadisədən sonra Arıqıran kəndində təhlükəli bölgədə olan ailələr üçün yeni evlər tikilib, Şahdağdakı ailələrə isə başqa yerlərdə ev almaları üçün pul vəsaiti ayrılıb.

Vüqar Baba