Yeni koronavirus ştammı - əlamətlər hansılardır, niyə həyəcan təbili çalınır?

Dünyada PJ.2.1 koronavirus variantı yayılır. İnfeksiyaya yoluxma hallarının ABŞ, Kanada və bir sıra Avropa ölkələrində qeydə alındığı bildirilir. Mütəxəssislərin sözlərinə görə, bu ştamın yaratdığı əlamətlər adi soyuqdəymə və ya mövsümi qriplə oxşardır.

Lent.az Ümumdünya Səhiyyə Təşkilatına istinadən xəbər verir ki, təşkilat 2026-cı ilin dekabrında COVID-19 peyvəndlərinin antigen tərkibinə yenidən baxmağı planlaşdırır.

Bununla əlaqədar alimlər və peyvənd istehsalçıları yeni SARS-CoV-2 ştamları barədə laboratoriya və epidemioloji məlumatları təqdim etməyə çağırılıb. Məlumatlarda PJ.2.1, eləcə də XFG ştamının ST.1 və SW.2.1 alt xətləri, LP.8.1 variantı nəzərə alınmalıdır.

ÜST-nin açıqlamasına görə, məsləhətçi qrup hazırda istifadə olunan peyvəndlərin yoluxma, simptomatik xəstəlik və ağır xəstəlik hallarına qarşı effektivliyini qiymətləndirmək üçün məlumatları nəzərdən keçirəcək. Təşkilat PJ.2.1-i də yeni yaranan variantlar sırasında qeyd edib.

PJ.2.1-in xüsusi əlamətləri müəyyən edilməyib

Mütəxəssislər bildirirlər ki, hazırda PJ.2.1-i əvvəlki koronavirus ştamlarından yalnız əlamətlərə əsasən fərqləndirmək mümkün deyil. Xəstəliyin əsas əlamətlərinə hərarət, üşütmə, öskürək, boğaz ağrısı, burun axması, baş ağrısı, əzələ ağrıları və güclü yorğunluq daxildir.

Bu əlamətlər qrip və digər kəskin respirator virus infeksiyalarında da müşahidə olunduğundan, xəstəliyin səbəbini yalnız insanın özünü necə hiss etməsinə əsasən müəyyənləşdirmək mümkün deyil. Dəqiq diaqnoz və müalicə üsulunun seçilməsi üçün laborator müayinə tələb oluna bilər.

Ştamın ağırlığı ilə bağlı məlumatlar araşdırılır

Hazırda mövcud klinik məlumatlar PJ.2.1-in əvvəlki variantlarla müqayisədə daha ağır xəstəliyə səbəb olduğunu təsdiqləmir. Bununla belə, virusoloqlar bu variantın genetik xüsusiyyətlərini, yayılma sürətini və peyvənddən sonra yaranan immun müdafiədən yayınma imkanını araşdırırlar.

Qeyd edək ki, ÜST-nin açıqlamasında PJ.2.1 barədə məlumatların peyvəndlərin effektivliyini qiymətləndirmək üçün təqdim edilməsi istənilir. Təşkilat həmin açıqlamada variantın ABŞ, Kanada və Avropa ölkələrində yayılması və ya ona xas əlamətlər barədə məlumat verməyib.