ABŞ-da 2001-ci ildə sevgilisinin ərini öldürməkdə təqsirli bilinən 73 yaşlı Ceyms Pavattı edam edilib.
Lent.az-ın xarici mediaya istinadən məlumatına görə, ölümcül iynə ilə edam Makalesterdəki Oklahoma ştatı həbsxanasında həyata keçirilib. Həbsxananın sözçüsü Lens Uestin sözlərinə görə, Pavatt yerli vaxtla səhər saat 10:12-də ölü elan edilib.
Pavatt birinci dərəcəli qətl və 39 yaşlı reklam direktoru Rob Endryu öldürmək üçün sui-qəsddə günahkar bilinib. Endryu əvvəllər həyat yoldaşı ilə birlikdə yaşadığı Oklahoma-Sitidəki evinin qarajında güllələnərək öldürülüb. Endryu şükranlıq bayramından əvvəl iki azyaşlı uşağını götürməyə gəlibmiş.
Pavatt Endryu ailəsi ilə eyni kilsəyə gedib və qətlə yetirilən kişinin həyat yoldaşı Brenda Enryu ilə münasibətdə olub. O, ayrıca mühakimə olunub və həmçinin edam cəzasına məhkum edilib.
Qətldən bir neçə həftə əvvəl Rob Endryu polisə bildirib ki, kimsə onu öldürməyə çalışır: avtomobilinin əyləc xətləri kəsilib. Ərinin ölümündən sonra Brenda iddia edib ki, cütlük maskalıların hücumuna məruz qalıb və onlar onu qolundan güllələyiblər və Endryunu ölümcül yaralayıblar.
Qətldən sonra Pavatt və Brenda Endryu qadının iki uşağı ilə birlikdə Meksikaya qaçıblar. Üç ay sonra ABŞ-a qayıtdıqdan sonra həbs ediliblər.
Keçən ay şərti azadlığa buraxılması ilə bağlı dinləmədə Pavatt Endryu güllələdiyini inkar edib və aşiq olduğu Brendanın sözlərinə inandığını iddia edib. O, yalnız məhkəmə zamanı onun onu nə qədər dərindən manipulyasiya etdiyini anlamağa başladığını söyləyib. Prokurorlar cütlüyün qətli birgə planlaşdırdığını və atəşi kimin açmasından asılı olmayaraq hər ikisinin eyni dərəcədə məsuliyyət daşıdığını iddia ediblər.
ABŞ ardıcıl ikinci ildir ki, 40 edam həddinə yaxınlaşır. Edamların sayının artması ölüm hökmünün tətbiqi ilə bağlı müzakirələrin yenidən başlaması fonunda baş verir. Ötən həftə Kaliforniya qubernatoru Qevin Nyusom vəzifəsindən getməzdən əvvəl yüzlərlə ölüm hökmünün yüngülləşdirilməsi niyyətini açıqlayıb. Ekspertlər bunun ölkə tarixində ən böyük kütləvi əfv ola biləcəyini təxmin edirlər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
