Misirdə ikinci mərhələ başladı

Bu gün səhər saat 8 radələrində Misirdə Konstitusiya ilə bağlı referendumun ikinci mərhələsi başlayıb. Lent.az-ın İTAR-TASSA agentliyinə istinadən verdiyi məlumata görə, ölkənin 17 əyalətində səsvermə üçün seçki məntəqələri açılıb.

Ümumilikdə 25.5 milyon seçici Konstitusiya layihəsini ya bəyənməli, ya da yox cavabı verməlidir. Ən böyük seçici kütləsi (4,3 milyon nəfər) Qiza əyalətindədir. Referendumun ikinci mərhələsində ölkənin cənubunda, Liviya ilə sərhəddə yerləşən rayonların, Nil deltasında yerləşən şəhərlərin əhalisi, o cümlədən müxalif əhval-ruhiyyəli Süveyş və Port-Səid şəhərlərinin sakinləri iştirak edirlər. 6 min 724 məntəqəyə bölünən 176 seçki dairəsində təhlükəsizliyi 85 min hərbçi və polis qoruyacaq.

Reqlamentə əsasən səsvermə saat 19:00-da başa çatmalıdır. Mərkəzi Seçki Komissiyası 10 minə yaxın hakimi də seçki prosesinin monitorinqinə cəlb edə bilib. Referendumun nəticəsi sabah məlum olacaq.