İslam Kərimovun qızlarının münaqişəsi davam edir

Özbəkistan prezidentinin qızı Gülnarə Kərimova bu dəfə «ailə sirləri» barədə Britaniyanın «The Guardian»qəzetinə danışıb.

«The Guardian» yazır ki, Özbəkistanın «birinci qızı» illər boyu inanılmaz lüks həyat keçirib, lakin indi Gülnarə Kərimova klan müharibəsindən salamat çıxmaq uğrunda mübarizə aparır.

Britaniya qəzetinə müsahibəsində xanım Kərimova bildirib ki, ailə üzvləri, ələlxüsus da bacısı və yeznəsi ölkənin yüksəkvəzifəli rəsmiləri ilə əl-ələ verərək onun məhvi üçün qəsd hazırlayıblar.

«Özbəkistanın bir nömrəli kübar xanımı çoxsahəli fəaliyyətə malik olub. Onun biznes maraqları, diplomatik statusu, zinət əşyalarının dizayn brendi və hətta müğənni kimi «Googoosha» adı var» – yazır «The Guardian». «Lakin indi o, iddia edir ki, anası və bacısı prezident atasına dezinformasiyalar ötürərək onun məhvinə çalışır».

Qəzet yazır ki, 2015-ci ildə Özbəkistanda növbəti prezident seçkisi keçiriləcək, bu mənada qoca və xəstə İslam Kərimovun yerini kimin tutacağı çox aktual məsələyə çevrilib.

Bir-neçə il əvvəl Gülnarə Kərimovanın bu vəzifəyə real namizəd olduğu barədə çox danışılırdısa da, indi artıq belə bir əminlik yoxdur.

Məhz buna görə də Gülnarə hazırda ölkənin yüksəkvəzifəli məmurlarına qarşı təbliğat müharibəsinə başlayıb, onları korrupsiya və başqa ağır cinayətlərdə ittiham edir.

HƏR ŞEY LOLANIN MÜSAHİBƏSİNDƏN BAŞLANIB

«The Guardian» yazır ki, Gülnarənin bacısı Lola əvvəllər mətbuatdan qaçardı, lakin bir neçə ay əvvəl BBC-yə verdiyi müsahibəsindən sonra daha açıq şəkildə gündəmə gəlib.

Qəzetin yazdığına görə, adlarının açıqlanmasını istəməyən Rusiya rəsmiləri bildiriblər ki, indi atasının real xələfi kimi Lola Kərimova-Tillayeva-nın namizədliyi aktuallaşıb.
Gülnarə da bildirir ki, hər şey bacısı Lola-nın BBC-yə müsahibəsindən sonra başlanıb.

Gulnara Karimova iddia edir ki, bacısı və yeznəsi onun barəsində saxta internet yazıları təşkil etməklə onu mübarizə meydanından çıxarmağa hazırlaşırlar.

«The Guardian» yazır ki, Gülnarə Kərimovanın ittihamlarına Özbəkistanın UNESCO-dakı səfiri kimi Parisdə yaşayan Loladan münasibət öyrənmək mümkün olmayıb. O, telefon zənglərinə və elektron poçta cavab vermir.

Bu arada Gülnarə Kərimova atasının guya onu döydüyü və saraydan qovduğu barədə iddiaları rədd edir. Bildirir ki, atası ilə onun arasında heç bir dava-dalaş və mübahisə olmayıb.

Bununla belə, Gülnarənin «The Guardian» qəzetinə verdiyi başqa cavablar vəziyyətin son dərəcə gərgin olduğunu göstərir.

GÜLNARƏNİ ZƏHƏRLƏMƏK İSTƏYİBLƏR?

Məsələn, Gülnarə Kərimova iddia edir ki, Özbəkistanın xüsusi xidmət orqanları onu və oğlunu mərgümüşlə zəhərləməyə cəhd ediblər. O, hətta «The Guardian» qəzetinə 2011-ci ildə Almaniya klinikalarından birindən verilmiş qan analizi nəticələrini göndərib. Gülnarənin qanında ağır metalların konsentrasiyası qeydə alınıb.

Buna baxmayaraq, xanım Kərimova onu kimin zəhərləyə biləcəyi barədə suala konkret cavab verməyib və ad çəkməyib.

«The Guardian» qəzeti yazır ki, Gülnarəyə qarşı hücumların arxasında Özbəkistan prezidentinin dayanıb-dayanmaması bəlli deyil, lakin prezident qızına aid bizneslərin son aylar ərzində nəzarətə götürüldüyü dəqiqdir.

Qəzet yazır ki, Avropa Birliyində korrupsiyaya dair iki təhqiqatın gedib Kərimovaya çıxdığından o, Cenevrədəki diplomatik postundan da geri çağırılıb.

ƏVVƏLLƏR KOR OLUB

Beynəlxalq insan haqları təşkilatları bildirirlər ki, Özbəkistan polisi və təhlükəsizlik qüvvələrinin zorakılığı və qəddarlığı barədə iddialar çoxdan səslənsə də, bu kimi məsələlərə Gülnarə Kərimovanın işıq salması ən azı qəribə görünür.

«Human Rights Watch» təşkilatından Andrew Stroehlein bildirir ki, o, Twitter vasitəsilə Gülnarə Kərimovanı Özbəkistanda uşaq əməyinin istismarı, 2005-ci il Əndican qətliamı barədə fikir söyləməyə çağırsa da, prezident qızı bundan imtina edib.
Andrew Stroehlein deyir ki, hətta Özbəkistanın BMT-dəki səfiri olduğu vaxtlarda da Gülnarg Kərimova bu məsələlər barədə susub.

«İndi onu kim ciddi qəbul edər ki?» –Andrew Stroehlein sual edir.

Karimova qəzetə müsahibəsində etiraf edib ki, ola bilsin, bu kimi həqiqətlərə əvvəllər gözü kor olub. O, deyib ki, öz biznesi ilə məşğul olub və rəsmilərlə konfliktə girmək istəməyib.

İSLAM KƏRİMOV ÜÇÜN ÇƏTİN SEÇİM

«The Guardian» yazır ki, Gülnarə Kərimova uzun illərdir atasının siyasi xələfi hesab olunub, lakin son müsahibəsində belə bir iddiasının olmadığını söyləyib.

«Mən bir daha təsdiq edirəm ki, heç vaxt prezidentlik və ya başqa bir siyasi ambisiyalara malik olmamışam. Yenə də narahat olanlara belə bir niyyətimin olmadığını təkrar bildirirəm» – deyib Gülnarə Kərimova.

«The Guardian» yazır ki, 75 yaşlı İslam Kərimovun səhhətinin ağırlığı barədə şayiələr dolaşır, o, ictimaiyyət qarşısında nadir hallarda görünür və müsahibə vermir.

Gülnarə Kərimova müsahibəsində bildirib ki, atası bu hadisələrdən xeyli əsəbiləşib, lakin iki qızı arasında heç kimə tərəfkeşlik etmir.

«Mən qəti əminəm ki, istənilən ata üçün çayın iki sahilindən birini seçmək çox ağır bir məsələ olardı» – deyib Gülnarə Kərimova.