İndoneziya parlamenti öz hökumətinə səsləndi: Ermənistan səfirlik açmasın

İndoneziya Beynəlxalq Tələbələr Assosiasiyasının vitse-prezidenti, azərbaycanlı tələbə Elmar İskəndərov İndoneziya Parlamenti Xalq Nümayəndələr Palatasının sədri Marzuki Alie ilə görüşüb.

E.İskəndərovun APA-ya verdiyi məlumata görə, görüşdə Azərbaycan-Ermənistan-Dağlıq Qarabağ münaqişəsi barədə M.Alieyə məlumat verilib. Öz növbəsində M.Alie dünya ictimaiyyəti tərəfindən beynəlxalq səviyyədə tanınmış Azərbaycanın ərazi bütövlüyünü və sərhədlərinin toxunulmazlığı prinsipini dəstəklədiyini bildirib. O, eyni zamanda Ermənistanın Dağlıq Qarabağı işğal etməsi nəticəsində Azərbaycana dəyən 300 mlrd. ABŞ dolları dəyərində zərərin kompensasiya şəklində Azərbaycan tərəfinə ödənilməsini vacib hesab etdiyini deyib: «Mən Xocalı faciəsini çox böyük diqqət mərkəzində saxlayıram. Ola bilsin ki, 21 il əvvəl Azərbaycanın Xocalı şəhərində baş verən hadisələri çox adam xatırlamır və ya heç xəbəri yoxdur. Xocalı şəhərində baş vermiş bu cür dəhşətli faciənin bir daha təkrarlanmaması üçün Xocalıda insanlığa qarşı cinayətləri vəhşicəsinə törədən şəxslər məsuliyyətə cəlb olunmalı və onlara qarşı məhkəmə və hüquqi proseslər həyata keçirilməlidir».

M.Alie bildirib ki, İndoneziya parlamenti, parlamentin Xalq Nümayəndələr Palatasının 1-ci Komissiyası, həm də parlamentin Xalq Nümayəndələr Palatasının rəhbərliyi İndoneziyanın Dağlıq Qarabağ münaqişəsində və Xocalı Soyqırımında mövqeyini əsas gətirərək, İndoneziya hökumətinə Ermənistanın Cakartada səfirlik açmasının təxirə salınması üçün müraciət edib: «2014-cü ildə Cakartada Ermənistan səfirliyinin açılması planları İndoneziyanın Dağlıq Qarabağ münaqişəsində və Xocalı Soyqırımı məsələsində tutduğu ədalətli mövqeyini və siyasətini dəyişməyəcək».