İslam Əməkdaşlıq Təşkilatının (İƏT) 57 üzv-dövləti gələn il fevralın 6-7-də Misir paytaxtı Qahirədə zirvə toplantısı keçirməyi planlaşdırıb.
Lent.az-ın xarici informasiya vasitələrinə istinadən məlumatına görə, bu haqda Misir xarici işlər nazirinin müavini Əmr ramadan açıqlama verib.
Yüksək səviyyəli görüşə Misir prezidenti Məhəmməd Mursi sədrlik edəcək. Bu fəxri vəzifəni ona təşkilata üç il sədrlik etmiş seneqallı həmkarı təhvil verəcək.
Zirvə toplantısının əsas mövzusu belədir - «İslam dünyası.Yeni çağırışlar və artan imkanlar». Toplantıda İsrailin Fələstin torpaqlarında yeni tikinti işlərini davam etdirməsi, Suriyada silahlı münaqişə, eləcə də «dindən sui-istifadə və ruhani fəaliyyət»ə dair məsələlər də müzakirə olunacaq.
Qeyd edək ki,İslam Əməkdaşlıq Təşkilatı 1969-cu ilin sentyabrında yaradılıb. Qurumun hədəfi siyasi, iqtisadi və sosial sahələrdə islam həmrəyliyini təmin etməkdir. Rusiya təşkilatda müşahidəçi statusa malikdir.