ABŞ-ın Konnektikut ştatının Nyutaun şəhərinin ibtidai məktəbində baş verən atışmada ölənlərin sayı 26-ya çatıb. Lent.az-ın “Reuters”-ə isitanadən verdiyi məlumata görə, həlak olanların 18 nəfəri uşaqdır.
Agentliyin məlumatına görə, atəşi şagirdlərdən birinin atası açıb. Atışma zamanı məktəbdə ən azı 600 uşaq olub. Cinayətkar məhv edilib. Bəzi agentliklər iki cinayətkarın olduğu barədə fərziyyə ilə sürüblər.
Hadisə baş verən rayondakı məktəblərdə fövqəladə mühafizə rejimi elan olunub.
Bu arada məlum olub ki, qatilin silahı qanuni şəkildə əldə edilib və onun anasının adına qeydiyyatda olub. APA-nın məlumatına görə, bu barədə “CNN” telekanalına istintaqa yaxın mənbələr xəbər verib.
Telekanalın məlumatına görə, polis hadisə yerində 3 ədəd silah müəyyən edib – Sig Sauer və Glock markalı tapançalar qatilin cənazəsi üzərində, Bushmaster markalı yarıavtomatik tüfəng isə onun məktəb meydançasında saxladığı avtomobilində aşkar edilib. Qeyd olunan silahların hamısı qatil Adam Lenzanın anası Nensi Lenzanın adına qeydiyyatda olub.
Bir qədər əvvəl yayılan məlumata görə, məktəbdə müəllimə işləyən Nensi Lenza təhsil müəssisəsində şagirdləri ilə birlikdə öldürülüb. Lakin CNN telekanalının məlumatına görə, Nensi Lenzanın çoxsaylı güllə yaraları olan cəsədi Nyutaunda, oğlunun mənzilində aşkar edilib.
Bir qədər əvvəl KİV-lər xəbər verirdi ki, Adam Lenza böyük qardaşı Rayanı, başqa versiyaya görə isə atasını da qətlə yetirib. Lakin bu xəbərlər sonradan təsdiqlənməyib.
Bakı vaxtı ilə gecə saatlarında ABŞ prezidenti Barak Obama xalqa müraciət edərək baş sağlığı verib. Obama çıxışı xamanı iki dəfə göz yaşlarını saxlaya bilməyərək ağlayıb.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
