[b]Rusiyadan Suriyaya dair yeni təklif [/b]

Suriyada kimyəvi silahdan istifadə məsələsi BMT Təhlükəsizlik Şurasının iclasında geniş müzakirə edilib. APA-nın “RİA Novosti”yə istinadən verdiyi xəbərə görə, iclas zamanı Rusiya Suriyada kimyəvi silahdan istifadənin araşdırılması üzrə yeni beynəlxalq istintaq orqanı yaratmağı təklif edib.

Qeyd edək ki, BMT Təhlükəsizlik Şurasının iclası Rusiyanın təşəbbüsü ilə çağırılıb. Buna səbəb Suriyanın Şərqi Quta bölgəsində növbəti kimyəvi silahdan istifadə olunması xəbərinin yayılması olub. Suriya müxalifəti, ABŞ və bir sıra Avropa ölkələri rəsmi Dəməşqi kimyəvi silahdan istifadə etməkdə ittiham edib. Suriya hökuməti bütün ittihamları əsassız adlandıraraq rədd edib.

Moskvanın təşəbbüsü TŞ-in digər daimi üzvü - Çin tərəfdən dəstəklənib. ABŞ, Böyük Britaniya və Fransa isə rəsmi Dəməşqi Suriyada kimyəvi silahdan istifadəyə görə günahlandırıblar.