Şotlandiyanın Qlazqo şəhəri yaxınlığında fəaliyyət göstərən təmizlik biznesinin sahibi Rozann Pelosi varlı evlərdən silsilə oğurluqlar etdiyini etiraf edib. O, il yarım ərzində İtaliya və Fransa moda evlərinə məxsus çantaları, brilyant üzükləri və dizayner zinət əşyalarını müştərilərin etibarından istifadə edərək minlərlə funt-sterlinq dəyərində oğurlayıb.
Lent.az xarici mediaya istinadla bildirir ki, Şotlandiya məhkəməsində 62 yaşlı Qlazqo sakini Rozann Pelosi ilə bağlı növbəti iclas keçirilib. O, internetdə özünü evlərin təmizlənməsi və vitrinlərin dizaynı üzrə mütəxəssis kimi təqdim edib. Qadın 2023-cü ilin martından 2024-cü ilin oktyabrınadək törədilmiş səkkiz oğurluq faktını etiraf edib.
Pelosi Qlazqonun cənub-şərqindəki varlı ərazilər sayılan Bosuell və Koutbric şəhərlərində imkanlı müştərilərin evlərinə daxil olaraq minlərlə funt dəyərində lüks əşyalar götürüb.
Oğurlanan əşyaların siyahısı kifayət qədər genişdir. Bosuelldəki evdən krem rəngli italyan moda evinə məxsus çanta, gümüş boyunbağı, sviter, ətir flakonu və fransız dizaynerlərinə aid qara çanta yoxa çıxıb.
Koutbricdə isə Pelosi iki brilyant nişan üzüyü oğurlayıb – biri üç daşlı, digəri doqquz daşlı olub. Təkcə çantaların pərakəndə satış qiyməti 2390 funt-sterlinqə çatır, Fransa istehsalı zinət əşyalarının isə beşrəqəmli məbləğdə dəyəri ola biləcəyi bildirilir.
Polis qısa müddətdə şübhəlinin izinə düşüb və saxlanıldıqdan sonra Pelosi təqsirini tam etiraf edib. Əvvəlcə ona 12 epizod üzrə ittiham irəli sürülsə də, sırğa, kəmər, nağd pul və bir çantanın oğurlanması ilə bağlı bəzi ittihamlar prokurorluq tərəfindən geri götürülüb.
Məhkəmə iclasında vəkil Niam Rankin bildirib ki, onun müdafiə etdiyi şəxs hazırda işləmir və əlillik müavinəti alır. Hakim Şirli Makkanna hökmün elanını zəruri hesabatların hazırlanması üçün təxirə salıb və Pelosinin növbəti iclasa gəlməsini tapşırıb. Həmin iclasda prokurorların dəymiş ziyanın tam məbləğini təqdim edəcəyi gözlənilir. Keçmiş təmizlikçi hələlik ölkədən çıxmamaq şərti ilə sərbəst buraxılıb.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
