Tanınmış müğənnidən etirazçılara dəstək - SƏHNƏDƏ SAÇINI KƏSDİ

İranda 22 yaşlı Məhsa Əmininin ölümündən sonra başlayan etirazlar bütün dünyaya yayılıb.

Lent.az xarici KİV-ə istinadən xəbər verir ki, türkiyəli müğənni Mələk Mosso da səhnədə saçını kəsdirərək, Məhisa üçün keçirilən etirazlara dəstək olub.

Digər bəzi qadın etirazçılar da saçlarını kəsərək və hicablarını yandıraraq videolar paylaşırlar.

Qeyd edək ki, sentyabrın 13-də 22 yaşlı Məhsa Əmini saçının bir hissəsinin göründüyü üçün məcburi hicab qanunlarını tətbiq edən "əxlaq polisi" tərəfindən saxlanılıb.

Həbsdə olarkən döyülərək komaya salındığı ehtimal edilən Əmini sentyabrın 16-da dünyasını dəyişib. Əmininin ölümü həm də illərdir rejimin zülmünə məruz qalan camaat, xüsusilə qadınlar üçün bir qığılcım oldu.

Əmininin ölümü ilə başlayan və bütün ölkəyə yayılan etirazlar 6 gündür ki, davam edir. Rejim qüvvələrinin sərt müdaxiləsi nəticəsində ən azı 7 nəfərin həyatını itirdiyi, yüzlərlə insanın yaralandığı, yüzlərlə insanın nəzarətə alındığı qeyd edilir. Küçələrdə hər şeyə müqavimət göstərən, baş örtüyünü yandıran, saçını kəsdirən qadınlar şəriət rejiminin devrilməsini tələb edir.