Kosmosa gedəcək məşhurlar məlum oldu

İngilis iş adamı Riçard Bransonun sahibi olduğu “Virgin Galactic” şirkətinin həyata keçirəcəyi kosmik səfərdə iştirak edəcək şəxslər bəlli olub. Lent.az-ın “haberturk.com” saytına istinadən verdiyi məlumata görə, Riçard Branson ticari xarakter daşıyacaq bu səfərlərdə iştirak etmək üçün 529 nəfərin qeydiyyata düşdüyünü söyləyib.

Riçard Branson onların arasında Ancelina Coli, Bred Pitt, Aşton Kutçer və müğənni Beyonce kimi məşhurların da olduğunu nəzərə çatdırıb. Riçard Branson kosmosa ilk səfərdə isə oğlu Sam və qızı Hollylə birgə özünün iştirak edəcəyini bildirib.

Qeyd edək ki, “SpaceShipTwo” kosmik gəmisi 2 pilotla bərabər, 6 sərnişini kosmosa aparacaq. Kosmik gəmi 110 kilometr yüksəkliyə qalxacaq. Bir neçə dəqiqə çəkisizlik şəraitində qalacaq sərnişinlər 2 saatlıq səfər üçün 198 min dollar ödəyəcəklər.