Yəmən prezidentinin şok görüntüsü – FOTO

Yəmən prezidenti Əli Abdulla Saleh bir ay əvvəlki sui-qəsd cəhdindən sonra ilk dəfə kameraların qarşısına keçib. Lent.az-ın “trtazerbaycan.com” saytına istinadən verdiyi məlumata görə, üzünün yanaraq eybəcər hala düşən və əli sarıqlı olan Əli Abdulla Saleh televiziya ilə etdiyi çıxışında konstitusiya çərçivəsində iqtidarı bölüşə biləcəyini söyləyib.

Ər-Riyadda 8 əməliyyat keçirdiyini bildirən Yəmən prezidenti ölkəyə nə zaman qayıdacağını açıqlamayıb. Çıxışdan sonra Əli Abdulla Saleh tərəfdarları paytaxt Səna küçələrində aksiya keçirərək sevinclərini atəşfəşanlıqla ifadə ediblər. Müxalifət isə Əli Abdulla Salehin ancaq məhkəmə qarşısına çıxmaq üçün ölkəyə qayıda biləcəyini bildirib.

Bu arada Yəməndə Əli Abdulla Salehin vəzifələrini yerinə yetirən vitse-prezident Ədb Rəbbu Mansur Hadi müxalifətə yeni plan təqdim edib. Plan ölkədə milli birlik hökumətinin qurulmasını, Əli Abdulla Salehin 60 gün içərisində iqtidardan çəkilməsini və prezident seçkilərinin keçirilməsini nəzərdə tutur.