Fransalı nazirlərə bəd xəbər

Lent.az-ın “Reuters” agentliyinə istinadən verdiyi məlumata görə, Nikolas Sarkozi baş nazir və Yelisey Sarayının icazəsi olmadan nazirlərə xarici ölkələrə tətilə getməyi qadağan edib.

Nikolas Sarkozi hesab edir ki, hökumət üzvləri vətənlərində istirahət etməli, yalnız istisna hallarda xaricə üz tutmalıdırlar.

Fransa prezidentinin bu bəyanatı baş nazir Fransua Fiyonun ailəsi ilə Misirdə, həm də Misir hökumətinin hesabına istirahətdə olması barədə açıqlamasından sonraya təsadüf edir. Üstəgəl, az əvvəl xarici işlər naziri Mişel Ayo-Mari ilə bağlı qalmaqal da yaşanıb. Fransa mətbuatı xarici işlər nazirinin ad günü ilə bağlı Tunisdə tətildə olduğunu yazıb. Ayo-Mari dekabrın sonlarında Tunisdə xalq hərəkatı başlayarkən devrilmiş Tunis prezidenti Abidin ben Əlinin xanımının sahibkar qohumunun təyyarəsi ilə geri qayıdıb. Xarici işlər naziri özü də həmin vaxt Tunisdə olduğunu etiraf edib, ancaq təyyarənin Abidin ben Əlinin xanımının sahibkar qohumuna məxsus olduğunu inkar etməyə çalışıb. O, nazir olduğu müddətdə bir daha şəxsi təyyarədə uçmayacağına da söz verib. Fransanın Sosialist Partiyası isə xarici işlər nazirini istefa verməyə çağırıb.