Çeçenistan parlamentində terror aktı: 4 ölü – YENİLƏNİB 1

Bu gün səhər saatlarında Çeçenistan parlamentində atəş səsləri eşidilib. Lent.az-ın “İnterfaks” agentliyinə istinadən verdiyi məlumata görə, hüquq-mühafizə orqanlarındakı mənbə jurnalistlərə bildirib ki, atəş açılması nəticəsində ölənlər var.

İlkin məlumata görə, terrorçu-kamikazenin özünü parlamentin ərazisində partlatması nəticəsində 2 nəfər ölüb. Hüquq-mühafizə orqanlarındakı mənbə hadisənin səhər tezdən baş verdiyini vurğulayıb: “İçində deputatların olduğu avtomobil parlamentin həyətinə girən zaman, onların arxasınca içində terrorçuların olduğu minik avtomobili də həyətə girib. Terrorçulardan biri üzərindəki parlayıcı qurğunu partladıb. Daha 2 terrorçu isə parlamentin binasına giriblər və atışma başlayıb”. Amma “İnterfaks” agentliyinin mənbəsi ərazidə partlayış olmadığını bildirir. Ölənlərin sayı barədə də müxtəlif informasiyalar gəlir. Bəzi məlumatlara görə, terrorçular 4 nəfəri öldürüblər.

O, parlamentdəki mülki şəxslərin evakuasiya edildiyini, ərazinin mühasirəyə alındığını və xüsusi əməliyyat keçirildiyini bildirib. Hadisə yerinə xüsusi təyinatlı qüvvələr cəlb olunub. Çeçenistan rəhbəri Ramzan Kadırov da hadisə yerindədir.

Bəzi məlumatlara görə, atışma bir neçə dəqiqə davam edib. Hazırda atışmanın dayandığı xəbər verilir. Digər məlumatlara görə, atışma parlamentin spikerinin kabineti yaxınlığında gedir. Spiker Dukuvax Abdurrahmanov sağdır.

Bəzi agentliklər terrorçuların bir neçə nəfəri girov götürdüyünü bildirirlər. Terrorçular binadakı otaqlardan birinə sığınıblar. Onların əlində neçə nəfər girov olduğu bilinmir.

Ərazidə nələr baş verdiyi barədə dəqiq informasiya yoxdur.