Erməni namizədlər Türkiyənin bələdiyyə məclislərinə seçildilər

29 martda keçirilmiş bələdiyyə seçkilərində iştirak edən erməni namizədlərin çoxu şəhər və qəsəbə məclislərinə seçilə bildilər, Vesti.az-ın Türkiyə müxbirinin məlumatına görə, müşahidəçilər ilk dəfədir ki, bu qədər erməninin seçilməsini indiki iqtidarın Ermənistanla isti münasibət qurması və türk-erməni sərhədlərinin açılması planları ilə izah edirlər. Əgər ermənilər indiyə qədər əsasən sol təmayüllü partiyalarda aktiv idilərsə, bu seçkilərdə namizədliklərini sağ partiyalardan da irəli sürməyə başladılar.

Vazgen Barın İstanbulun Şişli, Raffi Hermon Araks Adalar, Ohanes Qarabetyan, Yervant Özuzun və Bedros Avedikyan Bakırköy, Verkin Arıoba isə Bəyoğlu bələdiyyə məclislərinə seçildilər.

Siyasi analitiklər ermənilərin bu gedişlə yaxında parlamentə də seçiləcəklərinin və öz millət vəkilini çıxaracaqlarının mümkün olduğunu təxmin edirlər. Sui-qəsddə öldürülmüş erməni jurnalisti Hrant Dinkin arvadı Rakel Dinkin qarşıdakı ilk parlament seçkilərində millət vəkilliyinə namizəd olacağı haqda məlumat dəfələrlə türk mediasında yer almışdı.