Fransada çadra qanunla qadağan olundu

İctimai yerlərdə çadra ilə gəzənlər 150 avro cərimə ödəyəcək, qadınları çadra taxmağa məcbur edən kişi 1 il həbsdə yatacaq

Fransa parlamentində müzakirəyə çıxarılan və çadra ilə ictimai yerlərdə gəzməyə qadağa qoyan qanun layihəsi qəbul olunub. Lent.az-ın “Reuters” agentliyinə istinadən verdiyi məlumata görə, qadağanı pozanları 150 avro cərimə gözləyir.

Qadınları çadra taxmağa məcbur edən kişiləri isə 1 il həbsdə yatacaq, 15 min avro cərimə ödəyəcək.

Qeyd edək ki, mayın 19-da Fransa hökuməti qadınların ictimai yerlərdə çadra ilə gəzməsinə qadağa qoyan qanun layihəsini bəyənib. Qanun layihəsinin qüvvəyə minməsi üçün parlament onu təsdiqləməli idi. Prezident Nikolas Sarkozi bildirib ki, onlar çətin, ancaq düz yola daxil olublar.

Xatırladaq ki, Fransa parlamenti mayın 12-də çadra taxılmasını mühakimə edən qətnamə qəbul edib. Qətnamə tövsiyə xarakteri daşıyıb.