Almaniyanı şoka salan görüntü

“Taliban”ın alman mücahidləri Angela Merkeli hədələyiblər

Almaniyada radikal islamçıların təsirinə düşərək dinini dəyişən və Əfqanıstanda “Taliban” sıralarında döyüşən alman gənclərinin görüntüsü şok effekti yaradıb.

Lent.az-ın “Reuters” agentliyinə istinadən verdiyi məlumata görə, özlərini “Deutsche Taliban Mujahedeen” (Alman Taliban Mücahidləri) adlandıran 20-30 yaşlı 5 alman gənc bir düşərgədə təlim keçir.

Alman silahlılar “Taliban”ın artıq adlı-sanlıları sırasına da keçməkdədirlər. Almaniya kəşfiyyatı onların arasında ən təhlükəlisinin 21 yaşlı Eric Breininger olduğunu bildirir. Eric Breininger “Taliban” döyüşçüləri ilə birgə Türkiyəyə yönəlik bir intihar əməliyyatının planlaşdırılmasında da iştirak edib. Alman kəşfiyyatı hazırda Pakistan-Əfqanıstan sərhədində onlarla almanın “Taliban” sıralarına keçmək üçün gözlədiklərini bildirib.

Bu görüntülər “Taliban”ın mətbu orqanı olan “Elif Medya” internet saytında yer alıb. Almanca danışan silahlılar Almaniyanın baş naziri Angela Merkeli müsəlmanlara qarşı xaç yürüşü aparmaqda günahlandırırlar.