Əsəd qızdı: “Ərdoğan sultan olmaq istəyir”

Rusiyanın “Russia Today” telekanalının əməkdaşı Dəməşqdə Suriya prezidenti Bəşər Əsəddən müsahibə götürüb. Lent.az-ın adıgedən kanala istinadən verdiyi xəbərə görə, müxtəlif suallara cavab verən Əsəd Türkiyə ilə münasibətlərdən də danışıb.

Müxbirin Türkiyənin Suriyaya yönəlik siyasəti ilə bağlı sualına cavabında Əsəd bildirib ki, bu gün ona qarşı müxalif qüvvələrə ən böyük dəstəyi Türkiyə verir. Suriya prezidenti Ərdoğanın özünü Osmanlı sultanı kimi apardığını qeyd edib: “Müxaliflərə dəstəyi türk xalqı yox, Ərdoğanın hakim iqtidarı verir. Ərdoğan sanki xilafət qurmaq, regionu Osmanlı imperiyası dövründəki kimi sultan olaraq idarə etmək niyyətindədir”.

Əsəd onu da qeyd edib ki, nə Suriya, nə də Türkiyə xalqları müharibə istəmir. “Bu müharibənin başlayacağını heç ağlıma da gətirmirəm. Amma Suriyadakı silahlı müxalifəti dəstəkləyən təkcə Ərdoğan hökuməti deyil. Qərbin təzyiqləri altında bəzi ərəb dövlətləri də müxalif qüvvələr üçün neft dollarlarının ağzını açıblar” - deyə o, bildirib.